Kolefnisjöfnun

Endurvinnslan hf. hefur sett það inn í umhverfisstefnu sína að kolefnisjafna starfsemi sína.

Flókið er að reikna út nákvæman ávinning af því að endurvinna drykkjarvöruumbúðir, en samkvæmt alþjóðlegum útreikningum er talið að kolefnisjöfnun af hverju tonni af endurunni áli sé um 9 tonn Co2 á hvert endurunnið tonn og um 2,5 tonn af Co2 fyrir hvert endurunnið tonn af PET plasti. Í heild er þetta því fyrir Ísland um 11.500 tonna nettó ávinningur á ári af Co2 við endurvinnslu drykkjarumbúða. Samkvæmt skýrslu sem unnin var af verkfræðistofuni EFLU fyrir Endurvinnsluna mun kolefnisjöfnun vegna endurvinnslu á hverju tonni af gleri vera um 0,4 tonn á hvert endurunnið tonn og því gæti bæst við ávinningur upp á um 2.400 tonn. Taka verður þessu með fyrirvara þar sem að unnið er með alþjóðlegar meðaltalstölur eða notaðar bestu nálganir. Til að setja þennan ávinning í samhengi, þá er kolefnisjöfnun vegna endurvinnslu plast og áls samsvarandi kolefnisbindingu um 6 milljón trjáa á ári.

Endurvinnslan hf. kolefnisjafnar einnig eigin rekstur og er þá miðað við hita og rafmang í því húsnæði sem notað er til að vinna drykkjarumbúðir til útflutnings, flugferðir starfsmanna, bifreiðanotkun eigin bíla og notkunar starfsmanna á bifreiðum til og frá vinnu og vegna sorps sem myndast við reksturinn. Samkvæmt skýrslu sem EFLA vann fyrir Endurvinnsluna hf., um kolefnisspor eigins reksturs, er kolefnisbinding jákvæð (binding umfram losun) um 51 tonn á ári.